Xa está colgado un PDF de dúas páxinas coa programación íntegra de Cineuropa, que inclúe unha interesantísima revisión da obra de João Cesar Monteiro. Leremos a axenda con atención e logo comentarémola; a miña impresión: si, pero…
Martin Pawley
Actualización: xa está dispoñíbel na páxina oficial de Cineuropa 2006, inda que de momento é o único que actualizaron. (programa 2006)
O filme Optimistas, de Goran Paskaljevic, é o gañador da Espiga de Ouro na edición 51 da Seminci. O director xa venceu no 1995 con A outra América, o derradeiro traballo cinematográfico da actriz galega María Casares. Lazar Ristovski, actor principal de Optimistas, recibiu o premio á mellor interpretación masculina.
O Premio Pilar Miró foi para a película arxentina Ciudad en celo, de Hernán Gaffet, incluída na programación de Cineuropa igual que outra das fitas galardoadas, Días de gloria, de Rachid Bouchareb, xa recoñecida no Festival de Cannes e que aquí acadou o Premio do Público.
En Santiago poderemos ver tamén o filme de clausura, Once in a lifetime: the extraordinary story of the New York Cosmos, de Paul Crowder e John Dower, un documental sobre a ascensión e caída do mítico equipo de fútbol de estrelas que acaba sendo, disque, un repaso apaixonante á época do Studio 54 e os asasinatos en serie daquel “Fillo de Sam” que recreara tan ben Spike Lee. A morte dos 70, en suma.
A programación de Cineuropa é un luxo: a selección de películas é modélica -dadas as circunstancias- e ano tras ano vai sempre superándose en cantidade e calidade. Agradécese a oportunidade que nos dan de ver os últimos traballos de Chabrol e de Kaurismaki, de comprobar o ben que se levan Frank Gehry e Sidney Pollack ou de aplaudir a apaixonante lucidez dun renacido Werner Herzog. Queremos disfrutar do prometido lote de cine asiático, con The host, Takeshi Miike, Johnnie To e as sorpresas que aínda non foron reveladas. Agradecemos que o seu carácter de “mostra” nos permita botarlle un ollo a obras que aínda tendo distribución en España dificilmente chegarán a Galiza; títulos que se viron esta mesma semana en Valladolid e outros que pasarán a finais de novembro por Gijón, como Quinceañera ou Shortbus. Cineuropa merece todos os meus parabéns, sen dúbida, pero o que non é de recibo é que a só seis días do seu arranque aínda non coñezamos suficientemente os seus contidos.
Entendo perfectamente que haxa algún aspecto relevante por pechar, entendo que a programación de todo o mes poida non estar completamente lista, entendo que non haxa catálogo impreso a disposición da xente e que tampouco estean na rede os horarios detallados de todas as proxeccións. Entendo iso, pero tamén penso que esa faceta debe mellorar espectacularmente ao longo dos próximos anos, se como parece a intención é que Cineuropa sexa o gran festival de cine de Galiza, e non só unha mostra para uso e disfrute case secreto dos composteláns, que coñecen o que se presenta a forza de ler “El Correo Gallego”.
Non pido que estea todo atado e ben atado cun mes de antelación. A data de hoxe non me preocupa o que poñan o día 27 de novembro, nin sequera o 15, pero si me interesa moito, moitísimo, saber o que hai o próximo xoves 2, e o venres 3, e a fin de semana que lle segue. Non pido máis que iso: saber como comeza. E non me refiro ao concerto da Filharmonía nin ao premio ao señor Ghobadi, non; eu refírome ás películas, que é o que importa.
Martin Pawley
Segundo anunciou onte o concelleiro de cultura de Santiago Néstor Rego, a edición número vinte de Cineuropa outorgará este ano non un premio, senón dous. Non é a primeira ocasión en que tal cousa acontece, pois xa no 2000 houbo gañador múltiple: José Luis Borau, Marisa Paredes e o produtor e distribuídor galego Emilio Baños. A lista de galardoados complétase cos nomes de Juan Echanove (2001), Federico Luppi (2002), Bigas Luna (2003), Manoel de Oliveira (2004) e Luís Tosar (2005), aos que engadimos agora os do compositor Stephen Warbeck e o director Bahman Ghobadi.
Stephen Warbeck é coñecido sobre todo por ser o oscarizado autor da banda sonora de Shakespeare in love, na que é até hoxe a súa única nominación aos premios hollywoodienses. Na súa filmografía sobresaen títulos célebres, como Billy Elliott ou Proof, e tamén outros bastante máis esquecíbeis como Cargo. Non é James Newton Howard, nin Elliot Goldentahl, nin Carter Burwell, nin Mychael Danna, nin Thomas Newman, e por suposto tampouco é Ennio Morricone ou John Williams, pero imaxino que quedaba máis a man que todos eles.
Bahman Ghobadi fíxose definitivamente coñecido cando levou a Cuncha de Ouro no Festival de Donostia 2004 coa película As tartarugas tamén voan, que volveu gañar este ano co seu novo traballo, Media lúa; antes de todo iso fora premiado nos festivais de Cannes e Gijón por O tempo dos cabalos borrachos. Vai camiño de convertirse nun director de auténtico prestixio; a min o seu paréceme un cine cargado de boas intencións pero raquítico, que vive decisivamente da mala conciencia que sentimos polo moito que facemos sufrir a tanta xente en todo o mundo, empezando polo pobo kurdo ao que el pertence. En calquera caso debo admitir que é unha elección razoábel que permitirá ao certame compostelán exhibir unha obra aínda moi pouco vista.
Martin Pawley
Os organizadores de “Cineuropa” fixeron chegar aos medios o pasado venres unha nota de prensa avanzando os primeiros contidos do certame. Deixamos a continuación o texto íntegro, e en próximos posts iremos desvelando novos detalles. Destacamos, para empezar, a presenza de “The host” dentro da exquisita selección de cine Made in Asia que promete proporcionar grandes momentos este novembro:
Este ano serán proxectados máis de cen filmes dos cales cincuenta son estreas
Cineuropa consolídase como o festival de cine de referencia en Galicia na súa XX edición
O festival de cinema CINEUROPA, organizado pola Concellería de Cultura de Santiago de Compostela, chega no vindeiro novembro á súa XX edición coa máis ampla e variada programación da súa historia. Do 2 ao 30 de novembro Compostela será a capital do cine independente, social e de autor. A proxección de máis de cen filmes, entre eles medio cento de estreas, servirá para celebrar estes vinte anos de compromiso do departamento municipal co cine de calidade.
CINEUROPA logrou ao longo da súa traxectoria facer sen dúbida realidade a vocación de erixirse no maior dos festivais de cine celebrados en Galicia, obxectivo co que naceu no ano 1986. Hoxe é o máis lonxevo de todos cantos eventos culturais deste tipo teñen lugar no noso país, ademáis de destacar como o que cada ano consegue reunir un número maior de espectadores, moitos deles fieis seguidores do ciclo.
Nesta edición as proxeccións, ademais de no Teatro Principal, o Salón Teatro, a Sala Yago, e a Fundación Caixa Galicia, desenvolveranse na Aula de Cultura de Caixa Galicia e no Centro Galego de Arte Contemporáneo (CGAC).
CINEUROPA acada ás dúas décadas de existencia e, para celebralo, son moitas as novidades das que os amantes do festival poderán disfrutar este ano. Novos premios e novas seccións. Ás xa tradicionais oficial, panorama internacional, documental e clásicos do cine, engádeselle este ano un apartado adicado ao cine musical recente. Por outra banda, reforzará a sección de cine asiático con títulos imprescindibles no actual panorama cinematográfico coma The Host, unha cinta coreana de terror que foi unha auténtica revolución de taquilla en Asia.
Entre as xoias cinematográficas que o espectador poderá ver este ano destacan Grbavica, gañadora do Oso de Oro en Berlín; El violín, premio ao mellor actor no festival de Cannes; Indigenes, premio á mellor interpretación en Cannes; Requiem, recoñecida como mellor película en Sitges, e El camino de San Diego, premio do Xurado en San Sebastián.
CINEUROPA proxectará tamén as últimas películas de directores de recoñecida traxectoria a nivel internacional coma Aki Kaurismaki, Sydney Pollack, Raúl Ruiz, Steven Soderbergh, Goran Paskaljevic ou Claude Chabrol. Na sección Cinefilias, de clásicos do cinema, exhibiranse filmes de Sam Peckinpah, Richard Fleischer e Godard, entre outros. E o traballo de Sydney Pollack ou de Werner Herzog poderáse ver no apartado de documentais.